அதிர்ஷ்டம்

நினைக்காத நேரங்களில் 
இல்லாத கதவுகள் 
தானாய்த் திறப்பது 


                       

அன்னைக்கு வணக்கம் !

பள்ளிக்கு போற பய
பொதி சுமந்து போறான்னு
பச்சரிசி சாதத்த பதமா செஞ்சவளே

மேற்பள்ளிக்கு போற பய
மேம்பட்டுப் மேன்நிலை அடைய
மேற்கொண்டு கடன முதுகுல சுமந்தவளே

காலேஜ்க்கு போற பய
கண் கலங்க கூடாதுன்னு
கண்ணில நீர திறபோட்டு  மறச்சவளே

அமெரிக்காவுக்கு போற பய
அவனிக்கே தலைவனாகப்  போறான்னு
ஆர்ப்பரித்து வானை தொட்டு திரும்பினவளே

நினைக்காத நாளில்லை மறந்த
பொழுதில்லை இயற்றினேனே என்
கவிதை நீ கொடுத்த தமிழினிலே

எட்டினேன் உயரத்தை
முட்டினேன் வானத்தை
படைத்த கவிதையை
மழையென பொழியவே !!

அழகுப் பூக்கள்

பூக்கள் அழகோ
பூக்கள் அழகோ
பூக்கள் போர்த்தும் பூமி அழகோ
பூமி உறையும் பிரபஞ்சம் அழகோ ?

பூக்கள் அழகோ
பூக்கள் அழகோ
பூக்கள் சொரிந்த கூந்தல் அழகோ
கூந்தல் சூடும் பெண்மை அழகோ ?

பூக்கள் அழகோ
பூக்கள் அழகோ
பூவினும் மெல்லிய மழலை அழகோ
கள்ளமில்லா மழலையின் நகை அழகோ ?

பூக்கள் அழகோ
பூக்கள் அழகோ
மனதைத் திருடும் பூக்கள் அழகோ
பிரம்மன் படைப்பில் பூக்கள் பேரழகோ ?

தேடல்

தேடினேன்
தேயாமல் தேடினேன்
தேடினேன்
ஓயாமல் தேடினேன்
தேடித் தோற்றேன்
தோற்ற பின்
கண்டு கொண்டேன்
வெளியிலல்ல என்னுள்
உறைபவன் இறைவனென்று

எழுத்துப் பிழை

பலருக்கு
தொட்டில் பழக்கமாய்த் தொடர்கிறது
சிறு வயதில் கற்ற
எழுத்துப் பிழை

பணம் வளர்க்கிறார்கள்
குணம் வளர்க மறந்து
பகை வளர்க்கிறார்கள்
நகை வளர்க மறந்து

இப்பூமியில் பிறந்தால்
இறக்க மாட்டோமென நினைக்கிறார்கள்
இருக்க  மாட்டோம் எப்பொழுதும்
என்ற நிதர்சன உண்மையறியாமல் 

கோட்டை விட்ட கதைகள்

தூரத்தில் உன்னை
கண்டவுடன் பாய்ந்து
பேச துடிக்கும்
என் மனது

அன்னியமாய் பதுங்குகிறதே
அமைதியாய், அருகில்
உனை கண்டவுடன்

முட்டாள் மனது
மறந்தது போலும்
தான் பாயாமல்
பதுங்கி கோட்டை
விட்ட கதைகளை

சொக்கத் தங்கம் !

தந்தையின் அன்பு
தாயின் உடலில்
சேமிப்பாய் சேர்ந்து

சொர்கக் கருவில்

     வட்டியின் குட்டியாய்

வேகமாய் வளர்ந்த

சொக்கத் தங்கத்தின்

சொச்சம் நாம் 

கோல்டன் கேட்

தெரியாமலா உனக்கு
"கோல்டன் கேட்"டென
பெயர் சூட்டினார்கள்
இல்லை.. இருக்காது
நிச்சயமாக இருக்காது ...

ஓல்ட் இஸ் கோல்ட்
என்ற பழமொழியை
பறைசாற்றி  நிற்கும்
புதுமொழி நீ

எத்துனை முறை
காண விழைந்தாலும்
அத்துனை முறையும்
தங்க நினைவுகளை
வார்ப்பது  நீ

கலர்க்  கனவுகளோடு
தினம் களமிறங்கும்
ஆயிரம் மாயிரம்
சிறகடிக்கும் மனங்களை
சிவப்பு கம்பளத்தில்
வரவேற்பது  நீ


இறைவன்
செம்மையாய் செதுக்கிய
சிற்பமோ நீ ?
திண்மையாய் தீட்டிய
ஓவியமோ நீ ?
காண்பவர் எவரையும்
அசராமல் கவரும்
மாயையோ நீ ?

   

பெண்மை

தாயாய் தாரமாய்
தினம் மகிழ்விக்கும்
தங்கக் குழந்தையாய்

தோழியாய் காதலியாய்
துன்பத்தில் துவழும்போது
தோள்சாயும் தோகையாய்

குறும்பான குழந்தையாய்
வீரமான வஞ்சியாய்
கோபம்கொண்ட குமரியாய்
பேதைப் பெண்ணாய்
அன்பான அன்னையாய்
அரவணைக்கும் அத்தையாய்
பழங்கதை பேசி
பண்பாளராக்கும்  பாட்டியாய்
திக்கெங்கும் நிறைந்திருந்தும்
திகட்டாத பெண்மைக்கு
மகளிர் தின நல்வாழ்த்துக்கள் !

வாழ்க்கை

கணிக்க முடியா ஓர்
கணிதம்
விவரிக்க முடியா ஓர்
விஞ்ஞானம்
விடையறிய முடியா ஓர்
விடுகதை

அது பங்குச்சந்தை அல்ல
நேற்றைய நிலவரப்படி
இந்நொடியை கணிப்பதற்கு

அது சதுரங்கமும் அல்ல
நடக்கப்போவதை கணித்து
மாற்றி விளையாடுவதற்கு

நிலவரத்தால் நடுங்காமல்
கணிப்பால் கலங்காமல்
வாழ்வை வாழ்வோம் !